!
ದಡಿಯ ಸೀರೆ
ತಲೆಯ ತುಂಬ ಸೆರಗು
ಕಣ್ಣಂಚಿನಲ್ಲಿ ಮಿಂಚು ಮೂಡಿಸುವ ಬೆಳಕು
ಗೌರವದ ನಗೆಗೆ ದೀಪ ಮಂಕು
ಬಿಸಿ ರೊಟ್ಟಯ ಮುಟಿಗೆ
ತುಸು ಬೆಳ್ಳೋಳ್ಳಿ, ಸಾಕಿಷ್ಟು ಜೀರಿಗೆ
ಪಡಸಾಲಯ ಕಂಬಕೊರಗಿ ಮೆಲ್ಲುತ್ತಲೆ
ತೊಟ್ಟಿಲ್ಲು ಜೀಕುತ್ತ
ನಾಳೆ ಬರುವ ಹುಣ್ಣಿಮೆಗೆ ಮಗಳಿಗೊಂದು ಸೀರೆ
ಬೆಳ್ಳಿ ಉಡದಾರ ಮೊಮ್ಮಗನಿಗೆ,
ದಿಂಬಿಗೊರಗಿದ ತಲೆ ತುಂಬ
ರಾತ್ರಿ ಸಂಸಾರದ್ದೆ ಹಬ್ಬ :
ಐವತ್ತರ ಜೀವ
ತಂತಿ ಬಿಗಿ ಮಾಡಿದ ಶರೀರ,
ಹಂಗಿಲ್ಲದ ಹಟ,
ಇಂದು ಗೂಡು ಹಾಕುವುದು
ನಾಳೆ ತೆನೆ ಮುರಿಯುವುದು
ಬೇಡಿ ಕೇಳಿದರೇ ದನಕ್ಕೆ ಹಿಡಿದಂಟು
ಕಣಕ್ಕೂ ನನ್ನ ಕರೆದಾರು
ಕೈ ಜೋಡಿಸಿದರೆ ಹಿಡಿ ಕಾಳು ಕೊಟ್ಟಾರು
ರಾಶಿ ದಾಟುವ ಮುನ್ನ ಬಾಳ ಕಟ್ಟುವ ಬಯಕೆ
ಒತ್ತಿ ಕಟ್ಟಿದ ಸೆರಗಿನಲ್ಲಿ ಲೋಕ ಮೀರುವ ಛಲ
ಬಿಡುವಿಲ್ಲ,
ಕಟ್ಟೆಯಲ್ಲಿ ಕುಳಿತು ಮಾತು ಕಟೆಯಲು
ದಣಿದು ಬಂದ ದೇಹಕ್ಕೆ ಹಂಡೆಯಲಿ ನೀರಿಲ್ಲ
ಕಾಲ್ತೋಳೆಯಲು,
ಯಾರಿಗೆ ಬೇಕೂ ಮಕ್ಕಳು
ಗಂಡ ದಂಡಪಿಂಡ
ಚಿಮಣಿಗೆ ಎಣ್ಣೆ ಹಾಕುವ ಹತ್ತು
ಎರಡು ಕೊಡ ನೀರು ಹೊತ್ತು
ಕಸಗೂಡಿಸಿ ದೀಪ ಹಚ್ಚಿದರೇ
ಜಗುಲಿಯ ಮೇಲಿನ ದೇವರ ಮುಖದಲಿ
ಮಂದಹಾಸ
ಮನೆತುಂಬ ಬೆಳದಿಂಗಳು
ದಡಿ ಸೀರೆಯ ಮುಖದಲ್ಲಿ ದಣಿವಿಲ್ಲದ ನಗೆ
ಅವ್ವನೆದುರಿಗೆ ದೇವತೆಗಳಿಗೂ ಹಗೆ!!!!
